Galicia Ártabra Digital Noticias de Ferrol y la comarca de Ferrolterra.
A pista máis curta que se vai reparar encóntrase no lugar da Pena, en Santa Mariña do Monte, e trátase dun camiño asfaltado de 505 metros de longo que conecta a estrada provincial DP-7603 co lugar de Vilachá pasando por detrás do Mesón Os Cazadores. No proxecto tamén se incluiu o camiño circular que lle dá servizo a dúas vivendas algo máis afastadas da pista principal, sumándolle á obra final outros 240 metros.
Dado que non é unha vía principal que soporte un tráfico intenso, os traballos correctivos consistirán nunha limpeza do firme e das cunetas que irá seguida do tapado de baches e a extensión dunha nova capa de rodadura con regas asfálticas e saburra. A pista manterá o seu ancho medio de 3,5 mtros no eixo principal e de 3 metros no tramo interior do lugar da Pena.
Na outra pista acollida ao Plan Camiña Rural, a que une os lugares das Ramisqueiras, As Leiras e Vilela, no Camiño Arriba, optouse por firme aglomerado. Tal e como reflicte o proxecto técnico, a primeira actuación consistirá nunha limpeza xeral da vía e das súas beiras, co cobxectivo de deixala nas mellores condicións posibles para recibir posteriormente a nova capa de rodadura de 5 centímetros de grosor e un ancho medio de 4,75 m, máis uniforme e seguro que o actual. A obra finalizará co pintado da sinalización horizontal.
O contrato encóntrase en licitación pública por un prezo de 104.333,09 euros, impostos incluídos. O Concello cubrirá parte deste investimento cos 86.229 da axuda do Plan Camiña Rural, cofinanciado por Medio Rural, o Ministerio de Agricultura e os fondos europeos do FEADER. Os custes do IVE serán asumidos con fondos municipais. Este plan, antes chamado Plan de Camiños Municipais, é un programa dirixido exclusivamente aos concellos para actuacións de ampliación, mellora ou mantemento de pistas de titularidade municipal que dean acceso en calquera punto do seu trazado a polo menos dúas parcelas agrícolas.
A obra de maior envergadura -a das Ramisqueiras ata Vilela- fora aprobada polo Concello a principios de ano como previsión do Plan Complementario do POS+, en espera de que a Deputación activase novas partidas económcias para poder levala a cabo. Porén, pouco despois activouse o Plan Camiña Rural 2025-2026 (o programa pode executarse en dúas anualidades) e o consistorio optou por acomodar nel este proxecto e o da Pena, de modo que tamén se acurtarán os prazos para ter listas as obras.
En marcha o acceso á área recreativa dos Currás
A licitación destas dúas obras prodúcese practicamente ao mesmo tempo que comeza outro proxecto de reparación viaria, neste caso financiado pola Deputación. E é que hai tan só uns días comezaron os traballos que rematarán co aglomerado da pista que enlaza Marqués de Figueroa coa zona deportiva e de lecer dos Currás, onde se encontran o campo de fútbol municipal e a piscina.
O proxecto en marcha consistirá no ancheado da estrada, o soterrado das canalizacións e a extensión dunha nova capa de aglomerado que incremente a durabilidade e a seguridade de todo este eixo viario, un dos máis utilizados da zona urbana de San Sadurniño, sobre todo nas fins de semana e no verán.
Da obra estase encargandoa empresa José No Mantiñán en Hijos Construcciones S.A. tras impoñerse a outras dúas ofertas cunha proposta de 85.789 euros, o que supón unha rebaixa de 5.500 euros do prezo base da licitación.
