Galicia Ártabra Digital Noticias de Ferrol y la comarca de Ferrolterra.
Tras a elección de Sandra Permuy como nova alcaldesa de Fene, no pleno celebrado o pasado 16 maio, o goberno municipal vén de reorganizar as responsabilidades das diferentes concellarías, co obxectivo de optimizar a xestión e reforzar o traballo das distintas áreas.
A alcaldesa Sandra Permuy asumirá, ademais das funcións propias da alcaldía, a responsabilidade directa da área de igualdade. A reestruturación contempla tamén novas competencias e áreas para os membros do goberno local, configurando un equipo que combina experiencia, renovación e compromiso.
Novas atribucións e responsabilidades
Manuel Polo, que até o de agora era o responsábel de urbanismo e obras, asumirá a 1ª tenencia de alcaldía e as áreas de urbanismo, persoal, benestar social e a delegación da auga.
Mª Carmen Martínez, que viña sendo a responsábel de medio ambiente, pasa a ocupar a concellaría de obras e a 2ª tenencia de alcaldía.
Justo Martínez, concelleiro de cultura, incorpora tamén a xestión da área de facenda, ao tempo que será o 3º tenente de alcaldesa.
Ángeles Coira, concelleira de promoción económica, suma a esta área as responsabilidades de formación e emprego e a xestión dos cemiterios, ademais da 4ª tenencia de alcaldía.
Adán Chao, que viña exercendo como concelleiro de deportes, será no novo goberno o responsábel das áreas de servizos e seguridade, e 5º tenente de alcaldesa.
Cristina García, que ocupaba a área de formación e emprego, pasa a dirixir medio ambiente e ensino.
E por último, Alba García, recentemente incorporada á corporación, asumirá as áreas de deportes e mocidade.
Un equipo “preparado e comprometido”
A alcaldesa de Fene, Sandra Permuy, indicou que “a reorganización das áreas responde ao obxectivo de dar un novo impulso á xestión municipal, reforzar as políticas públicas e estar máis preto da veciñanza”. E valorou moi positivamente o novo equipo, que definiu como “diverso, que combina experiencia e renovación, e que comparte un proxecto común para seguir mellorando Fene desde a proximidade e a transparencia”.
“Fene conta cun goberno cohesionado, con persoas moi preparadas e comprometidas co seu traballo”, destacou a alcaldesa, quen asegurou que o novo reparto das áreas de goberno entrará en vigor “de forma inmediata”, co obxectivo de dar continuidade ao traballo desenvolvido até o momento e afrontar os novos retos do mandato.
