Galicia Ártabra Digital Noticias de Ferrol y la comarca de Ferrolterra.
A VII Feira do Gando Vacún en Moeche terá, desde este ano, data fixa no calendario, o segundo domingo do mes de xuño. Xunto con esta novidade, outorgaranse premios para os gandeiros participantes e incluirá de novo o concurso de fotografía, aberto a toda a cidadanía.
Moeche celebra a VII Feira do Gando Vacún, que terá lugar o próximo 8 de xuño, segundo domingo do mes, cumprindo así cunha das novidades desta edición: a elección desta data como xornada fixa para este evento anual, un dos máis destacados do calendario local. A Feira do Gando Vacún é un dos encontros anuais que desde hai uns anos se celebran o recinto feiral de Moeche co fin de dinamizar ese espazo e darlle cabida aos diferentes sectores do municipio.
Tras non poder celebrarse o pasado ano debido á epidemia epizoótica, a feira regresa en 2025 con enerxías renovadas e novas propostas. A cita, organizada desde a primeira edición coa colaboración cos gandeiros de Moeche e da contorna, servirá como punto de encontro para profesionais do sector, veciños e visitantes, con actividades pensadas para todos os públicos e para poñer en valor a vida e o traballo dun sector tan importante como o gandeiro, e, sobre todo, como punto de exhibición, venda e compra de gado.
Entre as novidades máis destacadas desta edición atópase a incorporación de premios económicos para os gandeiros participantes. Por unha banda, recoñecerase a participación das tres manadas máis numerosas con premios de 150€, 100€ e 50€, respectivamente. Doutra banda, o público asistente tamén terá un papel protagonista á hora de elixir á mellor vaca da feira. Para iso, habilitarase unha urna no recinto feiral na que os visitantes poderán depositar o seu voto indicando o número de crotal da súa vaca preferida. A vaca que reciba máis apoios será distinguida cun premio de 100€.
V Concurso de Fotografía da Feira do Gando Vacún
Xunto ao compoñente gandeiro, a VII Feira do Gando Vacún incluirá de novo o concurso de fotografía aberto a toda a cidadanía, co obxectivo de reflectir a riqueza visual e humana do mundo rural. As fotografías, que han de ser inéditas, poden enviarse ata o 3 de xuño ao correo correo@moeche.gal. No correo farase constar o título da imaxe e o nome da autora ou autor.
A convocatoria divídese en tres categorías: Foto dunha gandería, Foto da vida no rural e Foto da infancia no rural. As obras presentadas estarán expostas na Nave do Mercado durante a feira, onde poderán ser contempladas polo público e valoradas por un xurado composto por persoas do ámbito veterinario, do tecido social de Moeche e do Consello Local da Infancia. Este tribunal outorgará un único premio por categoría, mentres que o público tamén poderá expresar a súa opinión a través dunha urna situada xunto á exposición e mediante a interacción coas imaxes na galería de Facebook do Concello de Moeche, onde o “gústame” tamén contará como voto.
