Pontedeume prepara a humanización da avenida de Ferrol

Xa están contratados os traballos de redacción do proxecto, cun tempo estimado de 4 meses.

O Concello de Pontedeume contrata os traballos de redacción de proxecto de humanización da avenida de Ferrol, un proceso que se pretende desenvolver en varias fases. 

Despois de recibir o pasado mes de decembro un anteproxecto no que se expuñan varias alternativas técnicas para a urbanización da avenida, hai unhas semanas foron finalmente contratados os traballos de redacción, cun tempo estimado de 4 meses. 

O alcalde Bernardo Fernández Piñeiro lembra que «durante os últimos anos xa se realizaron diversas actuacións de renovación da rede de saneamento, abastecemento e pluviais por importe de case 200.000 euros». 

«Con este proxecto acometerase a renovación do firme e as beirarrúas co obxectivo de mellorar a accesibilidade da avenida, así como a renovación do mobiliario urbano, a creación de novas zonas verdes e a mellora da iluminación», explica o rexedor. 

«Trátase dunha obra fundamental e que é moi agardada pola veciñanza da zona, xa que dará nova vida á avenida de Ferrol», conclúe Fernández Piñeiro.