O teatro Jofre, Ferrol, acolle unha obra infantil sobre Castelao

O ciclo de teatro infantil programado pola concellería de Cultura de Ferrol volta este mes coa obra Castelao de Culturactiva Producións, o domingo 11 de maio ás 12:30 horas no teatro Jofre e dirixida ao público familiar (a partir de 6 anos de idade).

Esta obra ofrece un percorrido pola paisaxe emocional de Castelao, un neno a piques de emprender unha das viaxes máis emocionantes que un rapaz pode experimentar: coñecer un pai ausente e atravesar o océano para descubrir América.

A través dun universo feminino, lévase ás táboas do teatro a figura de Alfonso R. Castelao, posiblemente o maior referente cultural de Galicia. Trátase dun proxecto imprescindible para que o público máis mozo coñeza a infancia, a vida e a obra dun xenio irrepetible que foi autor, debuxante, pintor, dramaturgo, humorista e pensador.

Castelao está escrita por Paula Carballeira e dirixida por Fina Calleja. Forman o elenco Cris Collazo e Mónica Caamaño.

As entradas están xa á venda na billeteira do Teatro Jofre e na web de Ataquilla