O Triatlón Ferrol acada o ascenso á primeira división do dúatlon nacional

Un terceiro e un cuarto posto nas derradeiras xornadas de liga en Albacete permítenlle ao club ferrolán regresar á máxima categoría.

O Club Triatlón Ferrol ascende á primeira división da liga nacional de dúatlon masculina despois dun terceiro e un cuarto posto nas derradeiras e decisivas xornadas celebradas en Albacete.

Na proba que máis puntúa da temporada, o campionato de España por clubs, o ferrolán Iván Puentes foi cuarto da xeral, Corentin Lefer, oitavo e Raphaël Dassonville tamén entrou no top-10 sendo noveno. Este formato premia ter un equipo equilibrado e competitivo desde o primeiro ao décimo integrante e así, cos resultados de Joan Ferrer, Manuel Pozuelo, Hugo Prida, Hugo Goiriz, Dani Esbrí, Pablo Pedrosa e Javi Castro, o club departamental rematou en cuarta posición.

Dependendo de si mesmos para ascender, este domingo o equipo de dúatlon por parellas estivo en carreira sempre nos primeiros postos. Corentin Lefer, Raphaël Dassonville, Hugo Prida, Hugo Goiriz, Joan Ferrer e Manuel Pozuelo fixeron que o conxunto ferrolán cruzase a meta como terceiros da Segunda División.

Con estes resultados, o Triatlón Ferrol remata a liga terceiro, a só 6 puntos do segundo, e ascende á primeira división. No mes de maio comezará a liga nacional de tríatlon na que o club de Ferrol este 2025 participará na máxima categoría.