Inauguración do «belén» da asociación «O tilo» en Ares

O alcalde, Julio Iglesias, e o concelleiro de Cultura, Eugenio Fernández Lago, acudiron o domingo, día 2, á inauguración do Belén da Asociación Cultural O Tilo. Este Nacemento poderá visitarse  en horario de 17.00 a 20.00, de luns a sábados, e de 11.30 a 13.30 e de 17.00 a 20.00 horas, os domingos e os días festivos.

O Belén de O Tilo ocupa unha superficie no antigo consistorio –praza da Constitución- duns 50 metros cadrados, e consta de 300 figuras de diversos tamaños, aínda que as máis abundantes son as de 17 e 21 centímetros. Ademais, conta con dez figuras móbiles.

Aínda que a entrada a este Belén é de balde, a asociación admite donativos, que este ano, segundo anunciaron, serán entregados á entidade Cáritas Parroquial de Ares.

O Tilo, así mesmo, indica que calquera colexio que desexe visitar este Belén poderá facelo, para o que deberá, previamente, poñerse en contacto coa directiva da asociación local.