Galicia Ártabra Digital Noticias de Ferrol y la comarca de Ferrolterra.
O Concello de Pontedeume informa de que ADIF contempla iniciar os traballos de limpeza e acondicionamento do noiro da Estación de Ferrocarril de Pontedeume ao longo do vindeiro mes de abril.
A Secretaría de Estado de Transportes e Mobilidade Sostible vén de comunicar que realizará esta actuación logo de que o noiro fose danado como consecuencia dos últimos temporais. Esta obra conta cun orzamento de 39.754,28€ máis IVE.
Así o trasladou a Secretaría de Estado o pasado día 18 tras a consulta realizada o 11 de febreiro por Montserrat García Chavarría, deputada socialista no Congreso.
Así mesmo, dende a Secretaría de Estado informouse de que está previsto adxudicar no segundo trimestre do presente ano o contrato para a instalación de cámaras de videovixilancia na mesma estación. Isto ten como fin evitar os constantes actos vandálicos que levan anos causando graves desperfectos nesta instalación, ao tempo que se mellora a seguridade na zona.
Estas actuacións enmárcanse dentro do compromiso adquirido polo secretario de Estado de Transportes, José Antonio Santano, no encontro mantido o pasado mes de maio co alcalde de Pontedeume, Bernardo Fernández Piñeiro, e a deputada Monserrat García Chavarría.
