Galicia Ártabra Digital Noticias de Ferrol y la comarca de Ferrolterra.
O Día Internacional da muller e a nena na ciencia conmemórase cada 11 de febreiro. Con motivo desta efeméride a Biblioteca municipal de Narón acolle a actividade lúdica “Un día de experimentos” este venres día 7, ás 18:00 horas, tal e como avanzou a concelleira responsable da área, Olga Ameneiro. 
A edil indicou que os nenos interesados en participar deberán ter os catro anos cumpridos e o carné da rede de bibliotecas sen sancións pendentes.
As inscricións poden formalizarse dende este martes ás 16:00 horas de xeito presencial na Biblioteca ou chamando ao número de teléfono 981 382 173 no horario de apertura.
Os menores participantes terán a oportunidade de divertirse e descubrir que a ciencia está presente en moitos aspectos da nosa vida, explorando o papel das mulleres na ciencia e practicando algún experimento sinxelo co que aprender conceptos científicos básicos de xeito divertido.
Entre os obxectivos desta convocatoria está o feito de visibilizar o papel das mulleres neste ámbito e fomentar a vocación científica entre os nenos. A ciencia axuda a comprender mellor o mundo que nos rodea, estimula a nosa creatividade, contribúe a desenvolver habilidades para a resolución de conflitos, axúdanos a cuestionarnos a realidade e esperta a nosa capacidade de superar retos.
