Galicia Ártabra Digital Noticias de Ferrol y la comarca de Ferrolterra.
A Deputación da Coruña da Coruña acolleu a sinatura do contrato para a execución da terceira e última fase das obras de ampliación e mellora da seguridade viaria na estrada DP-3612 de Aneiros a Cabana, en Ferrol, por importe de 651.375 euros.
A este orzamento hai que sumar os 135.036 euros destinados ás expropiacións dos terreos necesarios para a ampliación do vial, xa completadas.
As obras darán continuidade ás realizadas en Serantes, onde a primeira e a segunda fase das obras supuxeron a ampliación da estrada e a construción de beirarrúas, o que supuxo unha notable mellora da seguridade peonil para a veciñanza.
Nesta nova fase, as obras desenvolveranse entre os puntos quilométricos 1+180, coincidindo coa intersección coa estrada a Balón, e 1+640 e incluirán a ampliación da calzada ata os 7 metros de ancho con beiravías de 0,5 metros e construción de beirarrúas de dous metros de ancho que contribuirán a mellorar a seguridade peonil nun vial que rexistra un intenso tráfico e casas moi preto da estrada.
O proxecto inclúe tamén a renovación dos servizos afectados, como a rede de saneamento e abastecemento de aug, e a instalación de nova iluminación con luminarias LED, máis eficientes e con menor consumo eléctrico que as actuais lámpadas de vapor de sodio.
As tres fases do proxecto suman un investimento total de 1,7 millóns de euros. O presidente da Deputación da Coruña, Valentín González Formoso, destacou que coa adxudicación desta última fase, o goberno provincial cumpre o compromiso adquirido coa veciñanza de completar a obra, creando unha travesía accesible e segura para os peóns ao longo de case 1,7 quilómetros nunha zona onde existen numerosas vivendas pero que carecía dun andén seguro para poder circular a pé.
