Inscrición en Narón nunha actividade para conmemorar o pasamento de Castelao

A Biblioteca municipal de Narón acolle este sábado 25 ás 11:00 horas, unha actividade lúdica organiza con motivo da conmemoración do 75 aniversario do pasamento de Alfonso Daniel Rodríguez Castelao.

A concelleira de área, Olga Ameneiro, informou que se trata dunha proposta dirixida a maiores de 4 anos e para a que é preciso inscribirse, a partir deste martes 21 ás 16:00 horas, de xeito presencial na Biblioteca ou chamando ao número de teléfono 981 382 173.

Con motivo da efeméride do pasamento de Castelao organizouse esta actividade para que as nenas e nenos se acheguen á súa figura, por ser un dos grandes persoeiros da nosa terra. Os menores participantes poderán coñecer máis polo miúdo a vida e obra de Castelao dun xeito lúdico e participativo.

Aprenderán xogando cos materiais especialmente deseñados polo persoal da Biblioteca que poderán levar despois para a casa. Para poder participar é preciso que os menores teñan o carné da rede da Biblioteca sen sancións pendentes.