Galicia Ártabra Noticias de Ferrol y la comarca de Ferrolterra.
Este sábado día 23, o grupo MIGALLAS porá en escea o espectáculo “ELAS PINTAN MOITO”; no local do CIRS de Cervás a partir das 19 horas.
O espectáculo, que fora solicitado polo concello de Ares para a súa inclusión dentro da REDE CULTURAL da Deputación da Coruña, desenvólvese ao redor das celebracións do Día Internacional contra a Violencia Machista.
Así, segundo explicita o grupo MIGALLAS na presentación do espectáculo “a través das artistas Xulia Minguillón, Sonia Delaunay, Yayoi Kusama e Frida Kahlo abórdase a cuestión da igualdade entre homes e mulleres en todos os ámbitos da vida, desde o máis cotián ata o da creación artística.
Ao longo da sesión, o público vai coñecendo a vida destas artistas e as dificultades que tiveron que superar, simplemente por ser mulleres, para ser independentes e facer realidade os seus soños. Invítase a reflexionar sobre o machismo da sociedade doutros tempos, a identificalo e a criticar a súa vixencia na sociedade actual”
O espectáculo está aberto a todos os públicos vai dirixido preferentemente a nenos; tentando animalas a desenvolver as súas capadidades creativas sen nengún tipo de traba e de ideas preconcibidas.
CONTIDOS SOBRE IGUALDADE DO ESPECTÁCULO “ELAS PINTAN MOITO”
A través das artistas Xulia Minguillón, Sonia Delaunay, Yayoi Kusama e Frida Kahlo abórdase a cuestión da igualdade entre homes e mulleres en todos os ámbitos da vida, desde o máis cotián ata o da creación artística.
Na historia de Xulia Minguillón, amósase que nas parellas, os dous membros teñen os mesmos dereitos e que as decisións hai que tomalas xuntos, sen imposicións dunha persoa sobre a outra.
Con Sonia Delaunay, trabállase a igualdade de deberes entre homes e mulleres á hora de coidar e atender as fillas e fillos e de realizar as tarefas domésticas así como o dereito a conciliar a vida familiar coa laboral.
Con Yayoi Kusama reflexionamos sobre a igualdade de oportunidades para homes e mulleres á hora de acadar o éxito e o recoñecemento na sociedade. Por último, con Frida Kahlo valoramos a importancia de ser unha mesma ou un mesmo sen facer caso dos prexuízos sociais machistas que limitan o noso desenvolvemento persoal.
