Afundación abre «Simultánea», unha exposición que mostrará 350 obras da súa colección de arte

Afundación, a Obra Social de ABANCA, abre este mércores 9 ao público o proxecto expositivo «Simultánea», que mostrará, ao mesmo tempo, en sete sedes, a súa colección de arte vista como nunca antes.

«O obxecto contemporáneo e doméstico» é a mostra deseñada para a Sede Afundación de Ferrol, onde o público poderá achegarse á representación dos obxectos e ambientes domésticos, combinando elementos tradicionais e perspectivas innovadoras.

A proposta, dunha envergadura inédita, nace para celebrar con toda Galicia, no marco da conmemoración do X aniversario da Obra Social de ABANCA, a riqueza dun patrimonio artístico ―Ben de Interese Cultural desde 2015― que Afundación tutela e divulga.

O proxecto expositivo mostrarase simultaneamente desde este mércores nas sedes de Afundación na Coruña, Ferrol, Lugo, Ourense, Santiago, Pontevedra e Vigo. Pola tarde, programáronse percorridos para todos os públicos, ás 19.00 e ás 20.00 h.