Galicia Ártabra Digital Noticias de Ferrol y la comarca de Ferrolterra.
Ata o día 6 está aberta a inscrición no evento, no que se reunirán artesas de toda Galicia e tamén de fóra da comunidade.
A Asociación de Mulleres Vila de Cedeira ten aberto ata este próximo domingo día 6 o prazo de inscrición na XVIII Xuntanza de Palilleiras e Labores Tradicionais que se vai desenvolver, co apoio do Concello, o vindeiro 19 de outubro. Segundo explica a presidenta da entidade, Ángeles Villar Fraguela, na edición de 2023 o encontro reuniu unhas 260 artesás, pero as celebradas antes do parón da pandemia chegaban a reunir preto de 400 persoas. De momento a maioría das agrupacións inscritas son da contorna, porén está apuntada tamén unha agrupación de Asturias e outras de diferentes puntos de Galicia.
A xuntanza servirá unha vez máis para amosar a vitalidade que ainda ten este tipo de traballo artesanal, tamén entre a xente moza, e para compartir e intercambiar coñecementos entre unhas e outras. Son unha inmensa maioría de mulleres, pero tamén hai homes, explica Ángeles Villar, e alomenos nesta ocasión está inscrito un na xuntanza.
O encontro desenvolverase no pavillón polideportivo municipal desde as 10.00 horas e durante toda a xornada, cunha parada de 14.00 a 16.00 horas para que as participantes poidan saír a xantar. Ademais das mesas nas que as participantes estarán palillando, ao redor haberá postos de venda de artesanía.
A Asociación de Mulleres da Vila realizará ao longo da xornada varios sorteos con diferentes premios, doazóns do comercio e a hostalería da zona, entre eles unha noite nunha casa rural. Tamén teñen previsto agasallar a todas as artesás participantes e ás profesoras cun detalle, un traballo feito por elas en patchwork, e entregar premios á palilleira ou palilleiro máis maior e á de menor idade, así como a agrupación máis numerosa e á que veña de máis lonxe.
Ángeles Villar anima a toda a veciñanza e xente da contorna a acudir ese día ao pavillón para ver en vivo este traballo, que “é todo un espectáculo”, o mesmo que fan desde o goberno local.
O Concello quere ademais quere poñer en valor o gran traballo que fai a asociación Mulleres da Vila, tanto na organización deste evento como no resto das actividades que desenvolven ao longo do ano, xa que son un piar importante para fomentar a convivencia e a vida activa das veciñas.
As inscricións poden facerse chamando aos números de teléfono 649 70 39 98 ou 636 787 265.
