Inscrición en Narón nun curso de Xestión de almacén-loxística

A concelleira de Formación de Narón, Natalia Hermida, anunciou a apertura este venres ás 8:30 horas, do prazo de inscrición nun curso de Xestión de almacén-loxística.

A convocatoria, tal e como indicou a edil, diríxese a un máximo de 15 persoas maiores de 18 anos, desempregadas e empadroadas no Concello de Narón, se ben poden apuntarse persoas desempregadas maiores de 18 anos doutros concellos que accederán á acción formativa no caso de non cubrirse todas as prazas con persoas de Narón.

A convocatoria desenvolverase, segundo as previsións, do 3 de outubro ao 18 de decembro deste ano no Centro Municipal de Formación Irmás Froilaz, na Gándara. As clases impartiranse de 9:00 a 14:00 horas de luns a venres (do 3 de outubro ao 25 de novembro) e as prácticas profesionais non laborais en empresas serán 5 horas ao día, no horario que se determine, do 26 de novembro ao 18 de decembro (un total de 80 horas).

As persoas interesadas en anotarse poderán facelo ata o vindeiro 26 deste mes ás 13.30 horas a través do Rexistro xeral do Concello, da Sede Electrónica de Narón, ou dos restantes medios contemplados no artigo 16.4 da Lei 39/2015, do 1 de outubro, do Procedemento Administrativo Común das Administracións Públicas.

A duración do curso será de 250 horas e quince máis dun módulo adicional. O alumnado abordará contidos como tipos de almacén, estrutura e organización; prevención de riscos laborais en actividades de almacenaxe; loxística, inventario de existencias, sistemas e equipos para a xestión de almacén, manexo e condución de carretilla elevadora…

A maiores, realizaranse 15 horas adicionais sobre un módulo transversal para o desenvolvemento de habilidades na procura de emprego.

O alumnado seleccionarase por rigorosa orde de inscrición no rexistro e as persoas interesadas en recibir máis información poden contactar co Servizo Sociocomunitario Municipal, no teléfono 981 337 700 (extensións 1108 e 1109).