Pontedeume celebra o centenario da declaración como BIC do Torreón dos Andrade

O Concello de Pontedeume celebra este venres 13 de setembro, o centenario da declaración do Torreón dos Andrade como Ben de Interese Cultural.

O Torreón e o desaparecido pazo dos Andrade foron declarados BIC o 13 de setembro do 1924, como así se recolle na por entón denominada “Gaceta de Madrid” número 261, do 17 de setembro de 1924.

Dende o Concello quérese conmemorar a devandita declaración coa proxección dunha iluminación especial do edificio e o lema da Casa dos Andrade, que permanecerá ata final de mes nunha das paredes do edificio para lembrar e poñer en valor o patrimonio histórico e arquitectónico da vila dos Andrade.

Con esta actuación dáselle continuidade á liña trazada ao longo do ano polo Concello de Pontedeume coas charlas “Educando en patrimonio”. O obxectivo destas charlas foi achegar á cidadanía conceptos fundamentais sobre a súa relevancia e a importancia da súa conservación.

Para recordar esta data, desde o Concello repartirase unha bolsa conmemorativa, que será entregada na Oficina de Turismo ao longo da fin de semana.