Narón retoma a campaña de recollida selectiva de aceites de cociña usados

O concelleiro de Medio Ambiente e Servizos de Narón, Manuel Ramos, informou que na xornada deste martes 16 o Concello retoma a campaña de entrega á cidadanía de embudes para a recollida selectiva de aceite de cociña usado.

Unha campaña que se levou a cabo en anteriores ocasións noutros puntos da cidade, como o Pazo da Cultura e o Centro Comercial Narón, tal e como recordou, e que nesta ocasión permitirá que os veciños recollan os embudes nas instalacións da nave de servizos do Concello e do Punto Limpo municipal.

As persoas interesadas nos embudes poden solicitalos na nave de Servizos, ubicada no quilómetro 1 da estrada de Cedeira, en horario de 8:30 a 13:00 horas, e tamén no punto limpo municipal, no polígono de Río do Pozo, de luns a venres entre as 9:00 e as 13:00 e pola tarde de 16:00 a 19:00 horas e os sábados de 9:00 a 14:00 horas.

O edil naronés recordou que os aceites de cociña usados recollidos poden depositarse en calquera dos colectores ubicados na cidade para este fin e mesmo no punto limpo de Río do Pozo. “Queremos contribuir a que cada vez sexan máis os veciños que recollan os aceites de cociña usados, algo máis sinxelo coa axuda destes embudes, e deste xeito evitar contaminación e gastos derivados de posibles atascos ou avarías na rede de saneamento”, asegurou.

O Concello encárgase de trasladar eses aceites usados a unha planta de reciclaxe para poder obter biodiésel. A campaña da que forma parte esta iniciativa conta co respaldo da Consellería de Medio Ambiente da Xunta de Galicia, no marco do Plan de Recuperación, transformación e resiliencia financiado pola Unión Europea-Next Generation EU.

As persoas interesadas en recibir máis información sobre esta campaña tamén poden contactar coa nave de Servizos do Concello, chamando ao número de teléfono 981 397 007.