Galicia Ártabra Digital Noticias de Ferrol y la comarca de Ferrolterra.
Algo máis de medio cento de mulleres que participaron nos obradoiros do programa municipal de Apoio para a inclusión social a mulleres recibiron os seus diplomas no Auditorio municipal de Narón
A alcaldesa, Marián Ferreiro, foi a encargada de entregarllos xunto coa edil de Benestar Social, María Lorenzo, conversando posteriormente coas alumnas destas accións, encamiñadas a diminuír os factores de risco social e ofrecer proxectos formativos cun fin prelaboral e social.
As clases impartíronse dende o pasado mes de outubro e remataron na xornada do venres 27. En total, 26 mulleres acudiron aos obradoiros Volve a clase, en dúas quendas e incluído o de alfabetización- impartidos na Casa da Mocidade de luns a venres, en horario de mañá e de tarde.
Un total de 10 asistiron ao de Apodérate, na Casa da Mocidade, os martes e xoves pola mañá, e as 17 restantes aos de habilidades prelaborais de hostalaría e habilidades profesionais e introducción ás novas tecnoloxías, estes últimos impartidos no Centro Municipal de Formación Irmás Froilaz, tamén entre os luns e venres en horario de mañá.
A rexedora local destacou que o obxectivo principal destas convocatorias foi “o apoio e acompañamento ás mulleres no proceso educativo e sociolaboral, promovendo o feito de que desenvolvesen unha serie de habelencias para avanzar na aprendizaxe de diferentes contidos”.
Ferreiro felicitou a todas as alumnas que remataron os diferentes obradoiros e animounas a continuar formándose de cara a mellorar a súa posible empregabilidade.
