Últimas prazas en Narón para participar no programa “Vémonos”

Os rapaces de Narón nadas entre 2007 e 2011 que desexen participar no programa “Vémonos” dispoñen aínda dalgunhas vacantes para poder anotarse. Así o indicou o edil de Mocidade, Ibán Santalla, que recordou que se trata dunha proposta que se levará a cabo na Casa da Mocidade do 8 ao 13 de xullo, en horario de mañá, de 10:00 a 14:00 horas.

Os menores participantes realizarán durante eses días unha gran variedade de actividades, como escape room, laser tag, karaoke e tamén terán saídas para practicar caiac e mesmo unha o 12 de xullo, na que se ampliará o horario de saída pola tarde, para desfrutar dunha xornada no Aquapark de Cerceda. Haberá tamén xogos cooperativos, un obradoiro LGTBIQ+, gincanas…

As inscricións permanecerán abertas ata o día 26 deste mes ás 13:00 horas, podendo tramitalas no Rexistro municipal, dende as 8:30 horas, e na Sede Electrónica de Narón, tendo preferencia os menores empadroados en Narón.

Para máis información pódese contactar co Servizo Sociocomunitario Municipal, a través do teléfono 981 337 700 (extensións 1108, 1109 e 1111).

O programa está subvencionado polo Ministerio de Igualdade, no marco do programa Plan Corresponsables no ámbito local.