A campaña arqueolóxica no castro cedeirés do Sarridal conclúe co achado de restos prerrománicos

A Xunta de Galicia conclúe (o venres 7) a última campaña de escavación financiada pola Consellería de Cultura, Lingua e Xuventude no castro do Sarridal, en Cedeira. A actuación, que conta cun investimento autonómico de 17.182 euros, saldouse co achado de restos da época prerromana.

Segundo explicou o director da campaña, Emilio Ramil, os traballos que se prolongaron durante un mes desenvolvéronse nesta ocasión na área posterior á sauna castrexa ou monumento con forno coa finalidade de recoñecer as diferentes estruturas exteriores relacionadas coa zona de alimentación do forno, muros cara o perfil norte e a continuidade da canle de desaugue procedente da piscina da cámara. Nesta zona acháronse restos da época prerromana, concretamente restos dos muros de catro vivendas circulares.

O castro do Sarridal é un xacemento fortificado da idade do Ferro, de tipo costeiro, inaccesible desde o mar e defendido desde terra por dúas murallas precedidas polos seus respectivos fosos.

Desde 2017 este xacemento está sendo escavado a través de varias campañas arqueolóxicas financiadas pola Dirección Xeral de Patrimonio Cultural da Xunta e o Concello de Cedeira. O máis destacado destas actuacións foi a localización dunha estrutura tipo sauna das denominadas “monumento con forno”, das que se conservan moi poucas en todo o noroeste peninsular.

Lea también

Os alcaldes de Cedeira e Valdoviño «sorprendidos» polo comunicado da Xunta sobre contaminación

Os alcaldes de Cedeira, Pablo Diego Moreda Gil, e Valdoviño, Alberto González Fernández, declaráronse “sorprendidos” …

Deja un comentario

Tu dirección de correo electrónico no será publicada. Los campos obligatorios están marcados con *