Rivas revisa o operativo de cara o 9X para garantir o dereito ó voto

A subdelegada do Goberno na Coruña, María Rivas, presidiu a reunión de Xunta Provincial de Seguridade co obxectivo de ultimar o operativo de cara ás eleccións ao Parlamento Europeo que se celebrarán o vindeiro domingo 9 de xuño.

Na reunión participaron responsables Policía Nacional, Garda Civil e as policías locais das tres cidades, e nela fíxose un repaso polo operativo loxístico que se despregará para garantir o proceso electoral na provincia da Coruña.

Nas vindeiras eleccións europeas poderán exercer os eu dereito ao voto na provincia de A Coruña un total de 1.089.174 electores e electoras. Ademais 8.364 son mozas e mozos que votan por primeira vez ao cumprir 18 anos desde as últimas eleccións celebradas o pasado 18 de febreiro,

En canto á loxística, a subdelegada destacou que A Coruña contará con 1.517 mesas electorais distribuídas en 887 locais electorais ao longo dos 93 municipios da provincia. Estas mesas estarán atendidas por 4.551 persoas que formarán parte das mesmas, que se conformarán a primeira hora da mañá coas persoas titulares, ou caso de non comparecer, coas suplentes.

María Rivas, á vista dos datos aportados no transcurso da reunión, avanzou que o dispositivo de seguridade para a xornada electoral, por parte de Policía Nacional e Garda Civil contará cun total de 2.375 efectivos aos que se suman as 1.008 persoas representantes da administración que tamén darán soporte á xornada electoral, sumando así un total de 3.383 persoas.

O traballo comezará o día anterior facendo unha requisa na Xunta Electoral Provincial, por parte da Policía Nacional.

Xa o día das eleccións tanto Policía Nacional como Garda Civil como ás policías locais -de xeito coordinado- procederan a facer unha requisa en cada un dos 887 locais previo o inicio do horario de votación, será a partir das 7:00 horas co obxectivo de garantir a apertura en condicións de todos eles; en caso de detectarse incidencias como por exemplo pintadas ou obstrución de pechaduras requirirase ao servizo de limpeza municipal ou á un servizo de cerraxeiría.

Tamén se procederá a un recoñecemento visual do entorno dos centros de votación.

Tanto Policía Nacional como Garda Civil despregarán ao longo do día patrullas, que no caso de PN serán estáticas e estarán de xeito permanente nos centros de votación, e por parte de GC serán patrullas dinámicas que percorreran os distintos locais habilitados para votar.

Por parte da Policía Nacional, haberá tamén unha dotación permanente na Xunta Electoral Provincial para dar reposta a incidencias e ás súas peticións.

A subdelegada lembrou que o despregamento humano que realiza a subdelegación na provincia resulta crucial para o óptimo desenvolvemento do proceso electoral. Desde o soporte loxístico necesario para o exercicio do voto ata a transmisión de datos de participación e escrutinio o día das eleccións.

Neste sentido, a subdelegada do Goberno quixo poñer en valor a implicación das Forzas e Corpos de Seguridade do Estado, o seu labor centrarase en facilitar que dende primeira hora da mañá ata que pechan os colexios, todo funcione e discorra con absoluta normalidade de cara garantir o dereito ao voto de toda a cidadanía nesta importante cita coas urnas.

Das 1.089.174 persoas que compoñen o total do censo electoral, 923.164 corresponden ao censo de electores e electoras residentes en Galicia (CER) mentres 166.010 son persoas do censo electoral de residentes no estranxeiro (CERA).