San Sadurniño acolle a fase de ascenso a Superliga masculina de volei

 

O pavillón municipal de San Sadurniño acolle do xoves 25 ao domingo 28 de abril a fase de ascenso á Superliga Masculina de volei nun torneo en que o Aldebarán-Intasa será anfitrión das outras cinco mellores escuadras da división de prata.

O Concello e o club local presentaron a competición en rolda de prensa, onde quedou patente o compromiso do equipo de saltar á cancha sen complexos para dar o mellor de si.

O adestrador Pablo Gómez Parga e a formación azul, integrada maioritariamente por canteiráns moi novos, causaron sensación na liga pola frescura e a efectividade do seu xogo, o que lles valeu para meterse por méritos propios na loita por unha das dúas prazas na máxima categoría que se desputarán a semana que vén. Para acadar ese obxectivo, equipo e Concello fan un chamamento ao máximo apoio da afección.

A recta final da SM2 e fase de ascenso á Superliga estará dividida en dous grupos cun todos contra todos en cada un deles.  No grupo A competirán o conxunto anfitrión, o Aldebarán-Intasa San Sadurniño, o UD Ibiza Voley e o cvleganes.com, mentres no grupo B participarán Textil Santanderina, Instercap Asisa Tarragona e CV Utrera.

O alcalde, Secundino García, expresou o “orgullo” que supón para San Sadurniño acoller un evento deportivo “que non todos os días temos a sorte de poder celebrar os concellos pequenos”, sinalando ademais que o Aldebarán competirá “en igualdade de condicións” con equipos procedentes “de cidades importantes” do Estado.

O rexedor local engadiu que a fase de ascenso tamén será unha oportunidade de “demostrar que temos capacidade organizativa para eventos deste tipo” e mostrouse esperanzado en que a resposta da afección e os resultados deportivos “sexan satisfactorios”, culminando así o traballo desenvolvido durante a temporada polo equipo e por Pablo Gómez Parga, “unha persoa xa case de San Sadurniño que en moi pouco tempo será un dos adestradores de referencia no voleibol estatal”, asegurou García Casal.

O presidente do CV Aldebarán, Uxío García, agradeceu o apoio “do Concello, da Deputación da Coruña e das empresas colaboradoras”, abundando deseguido en que o técnico e os xogadores terán a oportunidade de exhibir na casa o xogo que lles valeu para acceder á fase de ascenso “sen máis presión” que a de “desfrutar do evento”.

García comentou neste sentido que será unha fin de semana “de celebración”, tamén para o público asistente ao torneo e avanzou ao respecto que os partidos estarán animados polo speaker deportivo e picadiscos malagueño Ángel Saura. “Imos centrarnos na fase de ascenso, pero queremos que sexa un evento que tamén divirta á xente”.

O adestrador do Aldebarán-Intasa, por outra banda, centrou a súa intervención na “grande oportunidade” que vai supor para os seus pupilos “que son mozos con pouca experiencia pero con moitas ganas”, dixo Parga- o participar nesta competición e poder facelo na casa “que sempre é un punto a favor”.

O histórico xogador e agora líder estratéxico do Aldebarán explicou que o equipo saltará á cancha do municipal “para competir da mellor maneira” e ofrecer espectáculo enfrontándose contra equipos “dun nivel económico maior que o San Sadurniño, pero non deportivo”.

O técnico argumentou  que o Intasa xa se mediu durante a liga con todos os seus contrincantes de dentro duns días, chegando a esta recta final na segunda posición do G-A da SM2. “Puidemos competir contra todos e situarnos como segundo clasificado do noso grupo”, defendeu Parga, ao tempo que manifestou o compromiso de toda a formación local de “traballar, adestrar e tentar dar o máximo” de aquí ao próximo domingo.

O edil de Deportes, Manel Martínez, destacou que San Sadurniño “poida ter un equipo deste calibre optando á primeira división do volei estatal” e aproveitou a rolda de prensa para facer un chamamento á participación do público enchendo as bancadas “porque imos ter enfrontamentos do máximo nivel”, ademais de recordar que o domingo das finais o municipio tamén vai acoller a Feira da Plantación.

Un apuntamento no que tamén incidiu Secundino García convidando a toda a xente que veña a San Sadurniño, “sobre todo a de fóra”, a que aproveite para “descubrir o noso territorio”. García tamén animou a encher o pavillón municipal para convertelo “na nosa bomboneira”.

Horarios e cruzamentos
Así as cousas, a menos dunha semana para que comece a grande festa do volei en San Sadurniño, o CV Aldebarán, como anfitrión da cita, ultima uns preparativos que se prolongarán até o xoves 25, día no que comezarán os encontros dos dous grupos en que se dividiu a fase de ascenso, que é tamén o torneo no que se decidirá quen queda campión da SM2.

O club publicou hai uns días no seu Facebook os prezos das entradas: 5€ media xornada e abonos a 25€ para toda a competición (15€ as persoas socias).

Salvo cambios que poidan producirse de aquí a xoves, os horarios e emparellamentos quedaron da seguinte maneira:

 

GRUPO A

Xoves 25 de abril, 20:00h

UD Ibiza Volley – cvleganes.com

Venres 26 de abril, 12:00h

Aldebarán Intasa – UD Ibiza Volley

Venres 26 de abril, 20:00h

cvleganes.com – Aldebarán Intasa

GRUPO B

Xoves 25 de abril, 17:30h

CDV Textil Santanderina – CV Utrera

Venres 26 de abril, 09:30h

Instercap Asisa Tarragona – CDV Textil Santanderina

Venres 26 de abril, 17:30h

CV Utrera – Instercap Asisa Tarragona

 

5º E 6º POSTO

Sábado 27 de abril, 11:00h 3º Grupo A – 3º Grupo B

SEMIFINAIS

Sábado 27 de abril, 17:30h 2º Grupo A – 1º Grupo B
Sábado 27 de abril, 20:00h 1º Grupo A – 2º Grupo B

FINAIS

Domingo 28 de abril, 10:00h Perdedor 1ª semifinal – Perdedor 2ª semifinal
Domingo 28 de abril, 12:00h Ganador 1ª semifinal – Ganador 2ª semifinal

Lea también

Programadas tres nuevas visitas guiadas al castro del Campo Sarridal, en Cedeira

El equipo de Axa Arqueología acaba de iniciar una nueva campaña de excavación en Cedeira, en …

Deja un comentario

Tu dirección de correo electrónico no será publicada. Los campos obligatorios están marcados con *