A Casa da Muller de Ferrol, terceiro edificio municipal con pictogramas

O alcalde de Ferrol, José Manuel Rey Varela, visitou a Casa da Muller para comprobar a instalación dos 22 pictogramas que Aspanaes está a instalar nestas dependencias municipais. “O pasado 30 de xaneiro comezamos a instalación de pictogramas na casa consistorial, seguiuse polo edificio social e agora tócalle á Casa da Muller”, expresou.

Rey Varela afirmou que “dentro da nosa apertura do Concello á cidadanía, non podemos esquecernos das persoas con capacidades diferentes facilitándolles o acceso físico e que poidan manexarse nas instalacións municipais”.

O rexedor agradeceu o traballo realizado por Aspanaes que fixo o estudo sobre as necesidades de apoios visuais, do que se extrae a necesidade de ubicalos en diversas ubicacións, polo que instalaron xa pictogramas na casa consistorial (45 pictogramas), edificio social (20) e agora na Casa da Muller (21).

A instalación seguirá pola casa solidaria (20), o pavillón de Esteiro (19), o polideportivo de Caranza (25), o centro cívico de Caranza (21), e o centro de emprego (24). “Queremos que as nosas instalacións sexan un espazo accesible cognitivamente con pictogramas que informan sobre os diferentes servizos”, sinalou o alcalde.

Está previsto que a instalación de pictogramas en todos estes edificios municipais esté finalizada o 30 de marzo.