Galicia Ártabra Digital Noticias de Ferrol y la comarca de Ferrolterra.
A concelleira de Festas do Concello de Narón, Mar Gómez, presentou xunto con Javier Freire, presidente da AVV Santiago Apóstol da Gándara, Francisco López e Juan Carlos Fernández, directivos da entidade, a décimosexta edición da Festa do Cocido da Gándara.
A celebración terá lugar o vindeiro 10 de febreiro a partir das 13:00 horas e as persoas interesadas en asistir poden inscribirse no local social da Gándara, de luns a venres de 10:30 a 12:00 e de 19:00 a 21:00 horas, ata o vindeiro 2 de febreiro, ás 22:00 horas.
A celebración gastronómica inclúe un menú a base de sopa, cocido, sobremesa e bebidas a un prezo de 17 euros para os socios da AVV Santiago Apóstol e de 22 para as persoas que non están asociadas á entidade. Así mesmo, hai opción dun menú infantil, a un prezo de 5 euros.
O evento levarase a cabo no pavillón da Casa da Mocidade, no que tamén haberá música en directo, tal e como avanzaron dende a organización.
As persoas interesadas en obter máis información poden contactar coa organización a través do teléfono 603 742 624 ou consultar as redes sociais da entidade veciñal (Facebook da AVV Santiago Apóstol da Gándara e Instagram A.VV. Gándara.
Dende o Concello e a organización animaron á cidadanía a acudir a esta cita gastronómica, da que a edil de festas salientou que “constitúe todo un referente entre os eventos que anualmente se organizan nesta parroquia da cidade, unha das máis poboadas”.
