Navitrén e os Poboados de Nadal continúan en Narón operativos

O Navitrén continúa percorrendo esta semana, ata o xoves día 4 incluído, algunhas das principais vías da zona urbana. En colaboración coa Asociación de Comerciantes de Narón o Concello impulsou esta proposta, de balde, e cuxos tickets das viaxes obtéñense por compras realizadas nos establecementos adheridos á campaña, preto de oitenta na cidade.

O Navitrén sae da estrada de Castela, nas inmediacións da Casa da Cultura, e realiza ao día dous percorridos, un máis longo, en horario de mañá, dende o Concello ata o muíño de Xuvia, pola estrada de Castela e outro máis curto, polas tardes, percorrendo un tramo da estrada de Castela, as rúas Rafael Bárez, Vigo, a avenida Concepción Arenal, estrada da Gándara e Bispo Argaya.

As saídas son ás 11:00, 12:00 e 13:00 horas pola mañá e ás 16:00, 17:00. 18:00, 19:00 e 20:00 horas polas tardes. Así mesmo, continúan operativos os Poboados de Nadal instalados na Praza da Gándara e que pecharán as súas portas o vindeiro venres 5 de xaneiro, xornada esta última na que abrirán en horario de mañá, de 11:00 a 13:00 e tamén pola tarde, de 17:00 a 20:00 horas, tal e como indicou a edil de Festas, Mar Gómez.

Pódense realizar algunhas compras nos postos instalados (librarías, bisutería, doces, artesanía, decoración…), e tamén participar en diferentes xogos baixo unha carpa instalada na zona.