Galicia Ártabra Digital Noticias de Ferrol y la comarca de Ferrolterra.
A concelleira de Promoción Económica, Olga Ameneiro, anunciou a apertura do prazo de inscrición no curso “Mellorando equipos”.
Trátase dunha proposta, tal e como indicou, dirixida ao sector empresarial en xeral, se ben está máis enfocado á hostalería e ao comercio. O curso impartirase nas instalacións do Centro Municipal de Formación Irmás Froilaz, na Gándara, e ofértanse un total de 30 prazas.
A persoa que impartirá o curso, que será os días 27 e 28 de novembro e 4 e 5 de decembro de 9:30 a 11:30 horas, ofrecerá aos asistentes algunhas claves para impulsar os seus negocios.
“Está deseñado para ofrecer a xerentes das empresas e empregados habelencias de comunicación e tamén técnicas para fomentar o traballo en equipo, mellorar o autocoñecemento para afrontar algunhas situacións complicadas dun xeito efectivo, abordar a xestión de conflictos e queixas dun xeito rápido e satisfactorio… cuestións moi útiles no día a día e que poderán poñer en práctica, no caso de ser preciso, de cara a esta mesma campaña de Nadal para impulsar os negocios da zona”, explicou.
A edil indicou que as sesións realizaranse durante dúas horas en cada unha das catro xornadas. “As prazas cubriranse por orde de inscrición e diríxense específicamente a persoas coas súas empresas ubicadas en Narón”, recalcou.
As persoas interesadas en inscribirse deben enviar o seu nome e apelidos, o DNI, o nome do seu establecemento e un teléfono de contacto ao correo electrónico: me.mendez@naron.gal ata este venres, día 24, ás 12:00 horas.
