Narón-Proxección da película “Dhogs” do Ciclo de cine en galego

O Ciclo de cine en galego organizado polo Padroado da Cultura do Concello de Narón e o Cineclube Serie B continúa este xoves, día 7 de outubro, coa proxección, ás 20.00 horas, da terceira das catro películas contempladas no programa, «Dhogs».  Trátase dun filme dirixido por Andrés Goteira e que foi o máis premiado dos recoñecidos galardóns Mestre Mateo, nos que obtivo trece premios.

Melania Cruz, Carlos Blanco, Antonio Durán «Morris» María Costas e Miguel de Lira forman parte do reparto desta película. Un executivo que tras unha intensa xornada de traballo vai a un luxoso hotel a descansar, coñecerá a unha muller á que invita a unha copa e coa que ten unha aventura. Cando ela se dirixe á súa casa é secuestrada polo camiño.

A última proxección deste ciclo será o vindeiro 14 de outubro, cando se poderá ver no Pazo, tamén ás 20.00 horas «Eroski Paraíso» (2019), dirixida por Jorge Coira e Xesús Ron, galardoada nos Mestre Mateo nas categorías de mellor protagonista feminino e masculino.

A Federación de Cineclubes de Galicia (Feciga), o Centro Galego de Artes da Imaxe (CGAI) e a Xunta de Galicia colaboran tamén nesta iniciativa, con entrada de balde.