Galicia Ártabra Digital Noticias de Ferrol y la comarca de Ferrolterra.
O Concello de Narón fixo efectivo este luns o terceiro e último dos pagos correspondentes ao convenio de cooperación entre o Servizo Galego de Saúde e o Concello de Narón para a execución das obras de construción dun novo centro de saúde na cidade. A alcaldesa, Marián Ferreiro, confirmou que esta última contía a abonar á administración autonómica ascendeu a 860.353 euros. “Con este pago rematamos o importe total comprometido dende esta administración local para a materialización deste proxecto, que en conxunto supuxo ás arcas locais unha achega de 1.460.353 euros”, recordou Ferreiro.
Os pagos realizáronse en tres exercicios económicos, tal e como se acordou no seu día entre ambas administracións. O primeiro deles foi de 100.000 euros e o segundo de 500.000 euros, facéndose efectivas no momento en que se encargou o proxecto básico e de execución das obras, no primeiro dos casos, e cando se presentou a xustificación da publicación do expediente de licitación das obras, no segundo caso. Esta terceira aportación abonada, de 860.353 euros materializouse cando se presentou a xustificación da formalización do contrato para a execución dos traballos do novo centro de saúde, tal e como se contemplaba no acordo asinado entre as partes.
O Concello cedeu unha parcela de 6.142 metros cadrados para a construción do inmoble e, a maiores, asumiu os gastos derivados da dotación á parcela das infraestruturas necesarias, como accesos rodados e peonís, abastecemento, saneamento, subministración eléctrica, alumeado, telefonía e a habilitación dunha zona de estacionamento, que se localizará fronte á parcela na que se constrúe o centro sanitario.
A mediados do pasado mes de novembro a alcaldesa, Marián Ferreiro, mantiña unha xuntanza en Santiago de Compostela co director da Axencia Galega de Infraestruturas, Francisco Menéndez, na que dende a Xunta se solicitou ao Concello que asumise os gastos derivados da intersección en forma de glorieta que dará acceso ao centro médico dende a estrada de Castela –vial de titularidade autonómica-. Ferreiro aceptou a proposta solicitando en contraprestación, ao non tratarse dunha actuación que deba asumir a administración local, que a Xunta constrúa beirarrúas na estrada de Cedeira.
Ferreiro incidiu en que “queremos que os traballos avancen a bo ritmo para evitar posibles retrasos na entrada en funcionamento deste tan demandado e necesario servizo na nosa cidade”.
