Ángel Mato comprométese a crear e recuperar espazos verdes públicos apostando polo parque do Montón

A creación e recuperación de espazos verdes de carácter público supón un dos eixos sobre os que Ángel Mato, candidato socialista á alcaldía de Ferrol, quere desenvolver a política urbanística e de rexeneración urbana. Así, ademais de considerar a árbore como “o mellor elemento ornamental” na humanización e urbanización de espazos públicos, o cabeza de lista do PSdeG-PSOE pretende, de acadar a confianza cidadá o 26M, crear e recuperar zonas verdes.

Para Mato, a recuperación e creación de espazos verdes de carácter público como “pulmóns da nosa cidade” ten unha importancia especial no deseño de Ferrol e, así, zonas como o Parque da Vía, a praza do Inferniño, o parque do Montón, o polígono de tiro de Catabais ou o parque Antón Varela de Canido constitúen espazos sobre os que os socialistas pretenden actuar para poñer en valor ditos espazos e dotalos de todo o necesario para que poidan ser disfrutados pola cidadanía. Precisamente o convenio de Defensa, unha vez máis, volta a ser fundamental neste obxectivo, xa que, como subliñou Ángel Mato, a súa sinatura suporá incrementar de forma notable o patrimonio natural e as zonas verdes ao longo de todo o municipio.

E a posta en valor e o coidado do inxente patrimonio natural que ten Ferrol forman parte tamén do programa de goberno socialista, a través do traballo coordinado das áreas municipais de Patrimonio, Medio Ambiente e Servizos, así como a aposta pola conservación e divulgación das especies arbóreas de Ferrol. Para fomentar o seu coñecemento e disfrute, Mato anunciou o deseño dunha ruta por estes xardíns e parques, cos escolares como destinatarios principais, instalando paneis informativos e didácticos que axuden ao coñecemento dos nosos bens naturais.

O parque do Montón, nomeadamente, constitúe un dos elementos sobre os que o equipo de Mato ten previsto actuar de forma preferente, dadas as potencialidades que ten este espazo como pulmón urbano da cidade, e nomedamente do barrio de Caranza, e dada a lamentable situación de abandono na que se atopa na actualidade despois de oito anos. O candidato socialista, que lembrou que o parque do Montón foi promovido durante o mandato de Vicente Irisarri, no que o propio Mato ostentaba a concellaría de Urbanismo, considera fundamental na política de recuperación de zonas verdes poñer en valor este espazo, e mesmo potencialo, instalando no mesmo a Aula de Ecoloxía de Urbana. Para o candidato socialista, o Montón é o lugar axeitado para acoller este equipamento, que ademais axudaría a dinamizar toda a contorna.