Cabanas quere converter ós máis pequenos en protagonistas da vida municipal co seu I Plan de Infancia

O Concello de Cabanas é un dos nove municipios de toda Galicia que presentou candidatura a converterse en Cidade Amiga da Infancia de UNICEF. Un distintivo do que tan só goza un municipio galego na actualidade e que recoñece o papel protagonista dos nenos e nenas na actividade municipal. É por isto que o Concello, a través da Concellería de Servizos Sociais, está a traballar na elaboración do I Plan Municipal de Infancia e Adolescencia. Un traballo no que se prima a participación e, de aí, que o primeiro paso fose iniciar unha ronda de contactos e entrevistas a fin de detectar as necesidades e problemáticas deste sector da poboación.

O obxectivo deste proxecto é identificar as prioridades e liñas de traballo en materia de infancia e adolescencia, así como construír canles de comunicación e participación onde as rapazas e rapaces sexan os verdadeiros protagonistas.

Nas últimas semanas o equipo técnico deste proxecto visitou os centros educativos do municipio para identificar as demandas do alumnado. Todas as nenas, nenos, mozos e mozas expresaron as súas opinións. Por outra banda, este equipo tivo diferentes reunións coa comunidade educativa (profesorado e ANPAS), entidades culturais, deportivas e sociais. O plan de traballo para estes meses culminará na construción de espazos de participación e coordinación entre as traballadoras e traballadores das áreas municipais, o equipo de goberno, os axentes sociais e culturais, e as rapazas e rapaces.