Cabanas cede á asociación Poceira Sport un espazo municipal na antiga unitaria de Irís

O alcalde de Cabanas, Germán Castrillón, e o presidente da ADC Poceira Sport, José Luis Maroño, veñen de asinar un convenio de colaboración polo cal o Concello cede á entidade cultural e deportiva o uso da primeira pranta da antiga escola unitaria de Irís –antigas dependencias da mestra-. Deste xeito, palía unha carencia e facilita á asociación o desenvolvemento das súas actividades.

En contrapartida, a entidade participará nos gastos que correspondan referidos a servizos como auga, electricidade, calefacción… e comprométese a asumir as tarefas de desbroce e mantemento dos terreos nos que se ubica a antiga unitaria. Así mesmo, e no marco das actividades de promoción cultural e deportiva que leve a cabo o Concello, Poceira Sport colaborará de forma gratuíta na medida das súas posibilidades.