Galicia Ártabra Digital Noticias de Ferrol y la comarca de Ferrolterra.
O alcalde e presidente da Mancomunidade de Concellos da Comarca de Ferrol, Jorge Suárez, inaugurou esta mañá no Centro Torrente Ballester a I Mostra de Cooperativismo e Economía Social de Ferrolterra, organizada pola Mancomunidade de Concellos da Comarca de Ferrol, que se desenvolve durante toda a xornada (de 9 a 21:00 horas) con acceso libre como escaparate do cooperativismo na comarca.
A mostra conta con diferentes postos de información sobre proxectos de economía social da comarca, atendidos polos protagonistas destas experiencias, centradas na visualización da economía social, como charlas e xogos onde se porá en valor os principios e valores cooperativos.
A finalidade desta mostra é fomentar que a cidadanía sexa consciente á hora de consumir na Economía Social, así como informar e asesorar ás persoas que teñan interese en emprender baixo a fórmula cooperativa en Ferrolterra. A economía social, explica Luis Alcalá, xerente da Mancomunidade, fundaméntanse nun conxunto de valores orientados a fins sociais como a primacía das persoas e do fin social sobre o capital, a igualdade de oportunidades entre homes e mulleres, a cohesión social, etc., promocionándose a solidariedade interna coa sociedade, e favorecendo o compromiso co desenvolvemento local.
A fórmula cooperativa foi, de feito, un dos modelos de emprendemento que mellor soportou a crise económica. Proba disto, apuntan desde a Mancomunidade, é que as cooperativas non só se mantiveron, senón que medraron: nos últimos 10 anos o número de cooperativas en Galicia aumentou en 300, e na actualidade son un total de 1.318.
Recentemente naceu unha grande organización que agrupa a agrupa a 181 cooperativas, das cales 152 son de traballo asociado, 28 de ensino e unha de consumo. Esta organización é a Unión de Cooperativas EspazoCoop. Na comarca de Ferrolterra, a porcentaxe maior de cooperativas corresponde ás de traballo asociado, tendo unha forte presenza nos centros de ensino, especialmente os de infantil, como Afesin.
