O BNG manifesta que a hipocresía do goberno e do PP coa xestión da EDAR non ten límites

O Bloque Nacionalista Galego de Ferrol considera que «este goberno nos toma por parvos e parvas cando foron eles xunto ao PP quen nos fixo cargar co morto dunha EDAR defectuosa e cos custes da súa reparación e da súa posta en funcioanmento. Se Narón non colabora nos custes de depuración é exclusivamente responsabilidade deste goberno e do PP que non sabían como facer para entregar a depuradora a EMAFESA e incrementar o seu volume de negocio«.

A hipocresía do PP e deste goberno acusándose mutuamente desta necedade non ten límites para os nacionalistas, xa que «foron eles os que aprobaron nun pleno municipal facerse cargo desta infraestrutura sen que exista contrato para a súa xestión con EMAFESA e sen que Narón e Neda formen parte deste acordo«.

Para o BNG a estas alturas semella obvio que con todo o que acontece respecto do saneamento e a EDAR «este goberno é cómplice de todo este despropósito, e son colaboradores conscientes de todo o que está a acontecer«. Para os nacionalistas, «o único que non agardaba FeC e que despois de refrendar os acordos do PP e lavarlle a cara ao anterior goberno municipal desde o PP se eximisen de toda responsabilidade e os deixaran aos pes dos cabalos dunhas decisións iniciadas e avaladas por esta organización política«.

Para Iván Rivas, portavoz municipal do BNG, o «lamentable é que a pesar de todo isto o goberno insista en seguir nese camiño trazado desde o PP e a Xunta de Galiza en colaboración con EMAFESA e non rache o convenio con ACUAES e con Augas de Galicia para a xestión dunha infraestrutura de sanemaneto da que nunca fomos responsables e da que non nos podemos facer cargo nestas condicións e que evidencia que detras das declaracións de onte do Alcalde da Cidade non hai máis que hipocresía«.