O Concello de San Sadurniño denuncia recurtes no servizo postal durante as vacacións

Varios veciños e veciñas acudiron estes días ao Concello para denunciaren retrasos na entrega de correspondencia por parte de Correos. Unha situación que, segundo parece, se debe a que nestes momentos só están traballando dúas das tres persoas de reparto que atenden todo o territorio municipal. O goberno local corroborou hoxe mesmo este extremo, atribuído a que a sociedade estatal non cubriu as vacacións dunha das carteiras, o que obriga ás outras dúas persoas contratadas a levar correo de recargo a zonas que non son as habituais para elas. Desde o Concello cursarase unha reclamación oficial no sentido de que se cubran as vacantes e que o servizo se preste «con normalidade» tamén durante o verán.

Desde a última reestruturación do servizo de Correos, en San Sadurniño hai tres carteiras titulares que se encargan de atender as sete parroquias do municipio en cadansúa área: Naraío, Igrexafeita e Cornide por unha banda; Ferreira, Lamas e Bardaos por outra e, por último, a zona de reparto de San Sadurniño, Silvalonga e Santa Mariña, que tamén inclúe a apertura pola semana da oficina no Centro Municipal de Empresas entre as 8.30 e as 10.00h.

Outra das novidades da reestruturación foi o traslado de todo o persoal para as oficinas de Narón e As Pontes, que desde hai algo máis dun mes asumiron a xestión do servizo nos municipios de San Sadurniño, Moeche e As Somozas. Unha reconfiguración de carácter interno que, en circunstancias normais, non incide sobre a atención aos usuarios e usuarias, xa que continúan tendo a mesma carteira e unha oficina de proximidade en San Sadurniño para recoller envíos pendentes.

Porén, tal e como explica Secundino García, «durante o mes de agosto Correos deixou sen cubrir as vacacións da titular de Ferreira, Lamas e Bardaos, e son os outros dous carteiros contratados quen se ocupan de facer ese traballo ademais do que xa teñen nas súas zonas de reparto«. O alcalde indica, ademais, que esta situación estaría producindo «retrasos inxustificados» que provocaron varias protestas veciñais: «hoxe mesmo estivo no Concello unha veciña que, segundo asegurou, recolleu na oficina de Narón unha decena de envíos, moitos deles recepcionados por Correos hai días«.

O rexedor local comenta que a sociedade estatal «usa a estratexia de recargar o persoal con traballo» en vez de facer novas contratacións que aseguren «unha correcta prestación do servizo«. «O sistema de cargarlle a valixa aos carteiros co correo dos compañeiros que están de vacacións pode funcionar nas cidades, pero non nun territorio rural con case 100 Km² de extensión, cos núcleos espallados e ducias de pistas. E máis aínda se algunha das persoas contratadas non coñece o territorio nin ten experiencia previa no reparto de carteirías rurais«, precisa Secundino García.

Diante desta situación que, de non cambiar, se prolongará durante todo o mes de agosto, o Concello informou da súa intención de cursar unha reclamación oficial na que se lle esixirá a Correos que o servizo se preste «con normalidade» instando á empresa á cobertura «das vacacións ou baixas que se poidan producir nas tres zonas de reparto do noso territorio«. Segundo apunta o alcalde, a reclamación tamén incluirá a demanda de que se contrate persoal «de inmediato» para solventar os retrasos que aseguran ter sufrido algúns usuarios.