Valdoviño inicia o proceso de contratación de dous técnicos de Turismo

O alcalde, Alberto González, informou esta mañá da apertura do prazo de presentación de solicitudes para tomar parte no proceso selectivo para a contratación laboral temporal de dous/dúas técnicos/as de Turismo por un periodo máximo de catro meses. Un, a tempo completo e outro, a tempo parcial. Unha contratación posible grazas a unha achega da Deputación provincial da Coruña.

O Boletín Oficial da Provincia daba conta hoxe do anuncio, abríndose un prazo de presentación de solicitudes de cinco días naturais, contados dende o seguinte hábil ao da publicación. Tanto as bases da convocatoria como o modelo de instancia están a disposición das persoas interesadas na web municipal (www.concellodevaldovino.com) e no propio BOP.

As funcións a desempeñar serán, a rasgos xerais, a atención ao público, atención telefónica, dar resposta á información demandada a través de correo ordinario, fax e correo electrónico, preparación de material promocional turístico para distintas feiras e eventos, colaborar no deseño e na elaboración de rutas comarcais, realización de visitas guiadas, arquivar documentos e informes, cubrir formularios e elaborar informes estatísticos.