Afundación organiza unha sesión de contacontos interxeracional en Ferrol para celebrar as Letras Galegas

Afundación continúa coas actividades programadas para a conmemoración do Día das Letras Galegas, este ano dedicado ao escritor Carlos Casares. A actividade principal é unha sesión de contacontos interxeracional que se levará a cabo en Ferrol na que socios e socias dos Espazo +60 Afundación da devandita localidade e nenos e nenas de educación infantil descubrirán xuntos o conto A galiña azul, unha obra que Carlos Casares escribiu para que Ana, unha rapaza que abandona Galicia xunto aos seus pais, nunca se esqueza do galego nin desta terra.

A sesión será o luns 22 de maio e nela participarán 4 socios e socias do Espazo +60 de Ferrol quen representarán o conto para nenos e nenas de educación infantil do CEIP Manuel Masdías. A actividade comezará ás 10.30 h e farase no patio da Sede Afundación de Ferrol.

A iniciativa enmárcase na liña estratéxica «O valor da experiencia», da Área de Envellecemento Activo de Afundación, que ten como obxectivo ampliar as oportunidades de participación e de contribución social das persoas maiores, aproveitando o seu talento e a súa experiencia vital e profesional, a través de programas interxeracionais e de voluntariado, que beneficien outros grupos da sociedade.