O Concello de Cabanas executa obras de ampliación no parque do Areal

O alcalde Cabanas, Germán Castrillón, informou que o Concello ampliará a zona recreativa do Areal e, con esa finalidade, comezaban esta semana os traballos contratados pola Administración local. O rexidor explicou que «a actuación permitirá sumar metros á área de xogos infantil construíndo unha cuberta de madeira tratada con forma hexagonal, que fai xogo coa temática do mobiliario urbano existente e que irá cuberta por un panel de imitación á tella. Así mesmo, a intervención sumará algúns elementos de xogo», apuntou.

Castrillón destacou ademáis que a actuación tamén contempla a construción duns aseos públicos anexos á edificación que alberga o Punto de Información Turística do Concello, xa que a zona carece deste tipo de servizos. Aseos que se dotarán de pezas sanitarias antivandálicas.

«A actuación permitirá sumar un novo atractivo á zona, á beira da praia da Madalena e do paseo marítimo. Un espazo central para o ocio e disfrute de veciños e visitantes. As obras, que se prevé conclúan este mesmo mes, contan cun orzamento de 39.759,03 euros, que se financiarán con cargo ó Plan de Acción Social da Deputación», asegurou.