O BNG urxe ao goberno de Suárez a posta en marcha da empresa municipal de transporte

O Bloque Nacionalista Galego de Ferrol, diante dos continuos recortes nos servizos que prestan as liñas de transporte público na cidade,considera «inasumíble» e fai imprescindíbel a posta en marcha da empresa municipal de transporte aprobada no pleno da corporación, considerando unha prioridad que debería desenvolver o goberno municipal e procurar redefinir o servizo co obxectivo de que preste un adecuado servizo, en horarios e frecuencias que cubra as necesidades sociais dos veciños de Ferrol tanto da súa zona urbana como da rural.

O BNG esixe ao goberno municipal que informe dos pasos que ten dado para dar cumprimento do acordo plenario, presentado polo BNG, para a creación dunha empresa municipal de transporte que posibilite que sexa o propio Concello, tras dispor da titularidade das concesión de transporte público na nosa cidade, o que preste directamente este servizo nas condicións adecuadas para o conxunto dos veciños e veciñas da cidade.

«A actual situación na que non existen limitacións concesionais nen planificación de servizos máis aló deste ano 2016 estabelece un marco totalmente aberto e sen condicionantes para que o goberno local decida libremente unha proposta de transporte público que se adecue as necesidades dos veciños», sinalaron dende a formación nacionalista.

A finalización do convenio do Plan de Transporte Metropolitano, na actualidade prorrogado exlusivamente durante este ano 2016, sumado a sentenza do tribunal supremo que anulou as prorrogas concedidas no ano 2010 ás concesions de transporte metropolitano, «definiran un escenario totalmente aberto diante do que o goberno local permaneceu totalmente pasivo». «O actual contexto permite que o Concello poida asumir a xestión das liñas urbanas coa constitución dunha empresa pública de transporte que en colaboración coa Xunta de Galicia de servizo a unha cidade cunha poboación confinada ao uso do transporte privado e que esta a sufrir ao mesmo tempo o desmantelamento dos precarios servizos ferroviarios actuais», argumentaron.