O Marcide realizou máis de 130 intervencións cirúrxicas coa nova Torre de Laparoscopia

Téñense realizado xa ó redor de 130 intervencións de Laparoscopia coa nova Torre de Laparoscopia 3D que se incorporou ó Servizo de Uroloxía do Complexo Hospitalario Universitario de Ferrol, hai medio ano. Esta nova torre implica a visualización tridimensional da cavidade abdominal e pélvica. Con ela, extrémase a precisión da disección, do corte e da sutura neste técnica cirúrxica minimamente invasiva, a laparoscopia, que o Servizo de Uroloxía da Xerencia Integrada de Ferrol era dos primeiros de Galicia en incorporar hai trece anos.

Entre as vantaxes propias da intervención a través de laparoscopia figuran un menor sangrado; a diminución da estadía hospitalaria; e unha maior comodidade postoperatoria, e con menos dor. Coa incorporación desta nova torre de laparoscopia 3D, ás vantaxes propias desa cirurxía minimamente invasiva -a laparoscopia- engádense a visualización tridimensional da cavidade abdominal e pélvica.

«Coa laparoscopia en dúas dimensións foi necesario adaptar a visión do ollo, e iso sempre dificulta e ralentiza a aprendizaxe; perdíase a visión en tres dimensións coa que se contaba ó facer unha cirurxía aberta, pero se gañaba en beneficio para o paciente, precisión, meticulosidade e visualización de espazos profundos», explica Andrés Rodríguez Alonso, xefe do Servizo de Uroloxía da Xerencia Integrada de Ferrol. «A laparoscopia 3D volve a proporcionar a terceira dimensión da cirurxía aberta, levando á cirurxía a unhas cotas de precisión impensables ata hai uns anos», engade.

Esta parataxe é a máis completa que existe na actualidade, e conta cunha punta angulable, moito máis manexable, para ofrecer una imaxe máis ampla e concreta, «permite movementos máis precisos e facer o que queres, no momento que queres», destaca Andrés Rodríguez Alonso. Con esta nova parataxe 3D, pódese ofrecer unha visión clínica crítica ó tempo que se mantén a orientación óptima da imaxe. Xunto con isto, coa imaxe HD en 3D conséguese maior profundidade de campo e un nivel axeitado de percepción desa profundidade. A punta angulable pode realizar unha curva de ata 100 graos en catro direccións.

Como indica o xefe do Servizo, «somos dos primeiros servizos de Galicia en aplicar esta técnica» (cando se incorporou só contaban con el Pontevedra e Vigo), e case toda a laparoscopia de Uroloxía realízase xa con 3D. «Neste momento é o mellor método laparoscópico do mundo», subliña. Ademais, engade, «a curva de aprendizaxe, o tempo no que os especialistas aprendemos a traballar con estes avances, é moito menor ó recuperar esa visión real nas tres dimensións».

«É como facer a intervención en aberto, pero con tódalas vantaxes xa citadas propias da laparoscopia”» matiza. Como exemplo, na cirurxía do cancro de próstata, que é na que máis frecuentemente se emprega, tódalas vantaxes citadas implican non só a resolución da problema, senón que de xeito paralelo permiten mellorar os resultados da incontinencia urinaria e da potencia sexual.

Cada vez máis laparoscopia

O Servizo de Uroloxía do Complexo Hospitalario Universitario de Ferrol foi dos primeiros en comezar a realizar a cirurxía laparoscópica, mediante pequenas incisións polas que se introducía a parataxe necesaria para operar. Esta técnica supuña mellorar a recuperación, ó ser as intervencións menos agresivas que a cirurxía aberta. No ano 2004, comezábase realizando dúas intervencións, e agora son ó redor de 1.300. A grande maioría realízanse para dar solución á patoloxía tumoral. En xeral, realizáronse preto de 700 intervencións laparoscópicas de próstata; as seguintes en número son as de ril, con preto de 400 intervencións; ó redor de 80 de chan pélvico; máis de 60 de vexiga; máis de 50 de Cirurxía Reconstrutiva; e máis de 30 suprarrenais.

No ámbito das intervencións con laparoscopia, e nos 13 anos que se leva empregando esta técnica cirúrxica, pasouse da media anual de 43 intervencións nos seis primeiros anos, á media de 152 dos últimos seis anos.

Láser verde

Por outra banda, lembrar que este servizo incorporaba este ano tamén a técnica cirúrxica a través da fibra óptica GreenLight Moxy, o que se coñece como o Láser Verde. Trátase tamén dunha técnica minimamente invasiva que se emprega para o tratamento da Hiperplasia Benigna de Próstata (HBP), que implica diferentes síntomas urinarios problemáticos e molestos. Consiste nunha fotovaporización endoscópica do tecido prostático, de xeito que se introduce unha fibra de láser verde endoscopicamente a través da uretra do varón. Esta luz vaporiza o tecido prostático converténdoo en vapor de auga.

Está indicada para chegar ó lugar desexado e realizar incisión ou escisión cirúrxica, vaporización, ablación, hemostasia ou coagulación de tecido brando. Neste senso, fotocoagula de xeito efectivo os vasos sanguíneos pola súa afinidade coa hemoglobina, o que a fai moi axeitada para pacientes anticoagulados ou de alto risco con enfermidades cardiovasculares ou respiratorias.

Entre as vantaxes do láser verde está un menor risco de sangrado, reducíndose case a cero, e un tamén menor tempo de sonda necesario. O período de hospitalización do paciente acúrtase considerablemente pasando incluso, ás veces, ás 24 ou 48 horas. Este aspecto permite unha máis rápida reincoporación á actividade física e laboral ordinaria.

«Ata o de agora, facíase a técnica da resección transuretral de próstata, unha técnica magnífica que é moi efectiva», explica o xefe do Servizo de Uroloxía, Andrés Rodríguez Alonso; e, agora, «pódese operar tamén con menos risco a pacientes cun peor estado xeral debido a problemas cardiovasculares ou respiratorios engadidos».

Xunto con isto, esta nova técnica evita en moitos casos a cirurxía aberta, xa que permite operar próstatas de maior volume que antes só se podían abordar con esa modalidade de cirurxía. Ata a actualidade, a Hiperplasia Benigna de Próstata (HBP) abordábase tanto coa mencionada resección transuretral como con cirurxía aberta e cirurxía laparoscópica, segundo o perfil de paciente, e en función do tamaño da próstata que se tivera que abordar.

Así, esta nova técnica facilita as cousas para a intervención sobre aquelas próstatas de maior tamaño, que antes tiñan que ser abordadas coa cirurxía aberta en lugar de cunha cirurxía minimamente invasiva. Evítase así o trastorno posterior que a cirurxía aberta supón para o paciente; e mellórase a súa recuperación e reincorporación á vida ordinaria.

Esta técnica de láser verde só se emprega na actualidade en Coruña e Pontevedra. «No caso da nosa área, ademais, incorpórase o láser verde de última xeración», afonda o urólogo, Andrés Rodríguez Alonso. Na Xerencia Integrada de Ferrol, realízanse ó redor de 50 intervencións ó ano para a abordaxe desta patoloxí