Galicia Ártabra Digital Noticias de Ferrol y la comarca de Ferrolterra.
O grupo de música folk Milladoiro estará este sábado, día 9, na parroquia naronesa de San Xiao, onde dará un concerto que comezará ás 22:30 horas. A edil de Cultura, Marián Ferreiro, recordou que «se trata dunha actuación de balde organizada polo Concello e a Asociación de Veciños Ceibe de San Xiao de Narón. O concerto terá lugar nas inmediacións do local social da parroquia».
A recuperación da música tradicional galega foi un dos obxectivos cos que no ano 1970 se creou este grupo de música folk e celta. «Os asistentes a este concerto poderán gozar de cancións do seu último álbum, “A Quinta das Lágrimas” e doutros anteriores», apuntou a edil. Así mesmo, Ferreiro destacou o feito de que «este grupo, considerado na actualidade un dos mellores de música celta no mundo e cunha ampla traxectoria nacional e internacional conta con importantes recoñecementos a nivel autonómico e estatal». A actuación programada en Narón será a primeira de Milladoiro na comarca este verán, xa que a súa xira estival levaráos tamén a Ortigueira e Ferrol nos meses de xullo e agosto, respectivamente.
Así mesmo, desde a organización apuntouse que coincidindo con este evento haberá unha sardiñada (tamén se servirán bolos preñados), a partir das 21:30 horas tamén nas inmediacións do local social de San Xiao, dirixida a todas as persoas que desexen acudir. O prezo é de 3 euros para os socios da AVV e 8 para o resto.
