Aberto en Narón o prazo de inscrición ao programa «ConciliaEscola Verán»

A concelleira de Igualdade, Teresa Sabio, anunciou a apertura do prazo de inscrición este mércores no programa ConciliaEscola Verán, organizado polo Concello en colaboración coa Deputación da Coruña. «A iniciativa desenvolverase entre os días 27 de xuño e 1 de agosto, en cinco quendas semanais, nas instalacións do CRA de Domirón, e diríxese a nenos e nenas de Narón de entre 4 e 12 anos», explicou a concelleira.

Os interesados dispoñen de prazo ata o 31 de maio para entregar a solicitude de inscrición no Rexistro municipal, en horario de 8:30 a 13:30 horas. A participación na actividade supón un custe de 8,15 euros por cada semana e participante e está limitada a un máximo de cen persoas en total.

«Convocamos unha nova edición do programa ConciliaEscola co fin de facilitar a conciliación da vida familiar e laboral aos naroneses e naronesas, ao tempo que apostamos por implicar aos nenos e nenas en diversas actividades formativas, deportivas e lúdicas coas que gozar do seu tempo de ocio durante uns días do verán», apuntou Teresa Sabio.

Os rapaces asistirán a diversos obradoiros como cociña, reciclaxe, deportivos, de medio ambiente e de xogos, entre outros, nos que contarán coa colaboración de varios monitores.

As quendas establecidas son do 27 de xuño ao 1 de xullo; do 4 de xullo ao 8 de xullo; do 11 de xullo ao 15 do mesmo mes; do 18 ao 22 de xullo e a última, do 26 de xullo ao 1 de agosto. Os horarios establecidos serán de 7:30 a 14 horas, con transporte só de volta, e de 9 a 14 horas con transporte de ida e volta. No que respecta aos desprazamentos, a edil de Igualdade recalcou que se realizarán paradas en todas as parroquias e que se informará dos horarios nunha xuntanza previa ao inicio da actividade, subliñando que será preciso adaptalos en función do número das mesmas e da cantidade de nenos e nenas a recoller en cada zona. Inicialmente as paradas previstas son: na Casa da Mocidade (A Gándara); no polideportivo Campo da Serra (na Solaina); na Praza do colexio de Xuvia; no Centro Cívico de Piñeiros; no Centro Cívico de San Mateo; na cooperativa do Val; no Pazo Libunca (San Xiao); no Paraxe, en Castro; no Centro Cívico de Sedes; e nas inmediacións das igrexas de Doso e Pedroso.

As prazas cubriranse por rigorosa orde de inscrición e terán preferencia os rapaces empadroados en Narón e cuxos pais traballen durante as datas nas que se desenvolve o programa. Para obter máis información pódese chamar ao Servizo Sociocomunitario Municipal, ao número de teléfono 981 337 700 (extensións: 1113 e 1115).