O BNG de Narón organiza unha campaña de apoio ás persoas refuxiadas

O Bloque Nacionalista Galego de Narón impulsa unha campaña de apoio ás persoas refuxiadas «e de rexeitamento da política deseñada pola Unión Europea para solucionar a peor crise humanitaria desde a II Guerra Mundial».

Así o manifestaron dende a organización nacionalista, quen instalará mañá martes na Praza da Gándara e o mércores na Praza de Galiza unhas tendas de campaña solidarizándose coas persoas que foxen da guerra e a miseria e de oposición ao acordo entre a Unión Europea e o Goberno de Turquía que permite a expulsión das persoas que chegan a este último país e a Grecia.

Nesa liña, o BNG organiza para o vindeiro mércores, ás 20 horas, na cafetería Ronsel II da Praza de Galiza, unha charla coloquio na que participarán o concelleiro do BNG en Lugo, Rubén Arroxo –que estivo recentemente no campamentos de refuxiados do Pireo- e un representante de Pallasos en Rebeldía.

Na presentación do acto estiveron presentes, ademais dos concelleiros do BNG de Narón, Pablo Villamar e Teresa Sabio, a responsábel comarcal, Mercedes Tobío, e Olaia Ledo, membro da Executiva Nacional do BNG.