O Concello de Narón anuncia una próxima rebaixa do valor catastral dos inmobles

O alcalde de Narón, José Manuel Blanco, anunciou esta mañá «unha próxima rebaixa do valor catastral dos inmobles da localidade que entrará en vigor a partir de 2017 e que repercutirá no importe dos recibos do Imposto de Bens Inmobles (IBI) da veciñanza».

Así o asegurou o rexedor local, quen explicou a proposta xunto co edil de Xestión Orzamentaria, Pablo Villamar. «A medida xurde das xuntanzas solicitadas polo goberno local con representantes da Xerencia rexional do Catastro», sinalou o alcalde recordando que «a última revisión catastral realizada no municipio data do ano 2008 e esta baixada no valor catastral dos inmobles xa se solicitou ao Catastro en mandatos anteriores, se ben non foi aceptada».

Blanco valorou a actual proposta, que se someterá a aprobación no pleno municipal do vindeiro xoves, incidindo na importancia da actualización dos citados valores «en canto que permitirá axustalos á realidade do mercado actual e, polo tanto, reducir o importe deste imposto nos inmobles da localidade».

Así as cousas, o rexidor naronés explicou que a Dirección Xeral do Catastro proporá un coeficiente do 0,92 para os inmobles localizados no termo municipal, ao rexistrarse a media dos actuais valores catastrais por riba do 50% do valor do mercado, tal e como indicaron desde o Catastro. «O Concello adherirase a esta proposta do citado organismo, o que suporá unha baixada no importe a abonar en concepto do IBI a partir do vindeiro ano ao aplicar ese coeficiente do 0,92 do valor catastral, en lugar de facelo sobre o 100%», indicou Villamar.

Esta medida súmase á rebaixa do tipo impositivo do Imposto de Bens Inmobles, que do 0,67% no ano 2011 –cando se obrigou desde o Goberno central aos concellos a aumentar a parte sobre a que podían actuar as administracións locais nun 4% (os coeficientes do tipo de gravame do IBI) para cumprir a lexislación vixente- situándoo no 0,70%. O grupo de goberno solicitou no ano 2012 unha baixada no IBI pero esta petición non foi atendida polo Goberno central. Finalizada a vixencia da medida o grupo de goberno aprobou no ano 2015 o Marco Orzamentario 2016-2018 cuxas rebaixas progresivas situaban o coeficiente no 0,68 no ano 2016, se ben finalmente, trala aprobación do Marco Orzamentario 2017-2019 se situou no 0,66%, explicou o edil de Promoción Económica, lembrando que «compénsase a maior parte do incremento xerado ao aplicar a regularización anual do 10% da diferencia entre a base liquidable e o valor catastral dos inmobles determinado polo Goberno central en 2008, en plena burbulla inmobiliaria».

O Ministerio de Facenda e Administracións Públicas será o encargado de comprobar se se cumpren os requisitos establecidos para acollerse a esta medida para que poida entrar en vigor no ano 2017.