O alcalde de Narón aclara ao PP que o gasto pola «crise da auga» foi menor a 6.000 euros

O alcalde de Narón, José Manuel Blanco, saíu ao paso das declaracións realizadas polo portavoz do PP naronés sobre a posibilidade de compensar á veciñanza pola crise da auga rexistrada do 16 ao 18 de xullo do pasado ano e que se prolongou durante 72 horas.

O alcalde lamentou de novo «a terxiversación dos populares dos datos económicos», «algo que non sorprende a estas alturas porque é unha práctica habitual do Partido Popular, como xa demostrou ultimamente cos datos do déficit e coas cifras de desemprego no Estado, entre outros».

Blanco refiriuse aos datos técnicos manexados pola empresa mixta municipal Cosma, adxudicataria do servizo de abastecemento e saneamento na localidade, «sendo a cantidade a devolver aos veciños de Narón menos de 6.000 euros para os aproximadamente 17.900 clientes da empresa na actualidade». «Trátase dunha cifra moi alonxada dos 44.000 euros calculados polos populares naroneses», recalcou o rexedor local.

Así mesmo, o alcalde recordou que «xa se lles explicou aos representantes do PP o motivo polo que se votou contra a moción presentada sobre a aplicación dunha compensación económica á veciñanza polos cortes no subministro. A negativa responde ao feito de que continuamos á espera de que a Valedora do Pobo conteste ao escrito enviado a mediados do pasado mes de marzo desde o Concello», aclarou o rexidor naronés. Xunto co documento adxuntouse unha copia dun informe emitido por Cosma sobre a postura da compañía sobre o tema das compensacións.

En canto ás medidas adoitadas desde o goberno local debido a esta situación, entre outras, Blanco recordou que «a prohibición afectou ao uso da auga embotellada para beber e cociñar, se ben era apta para outros usos. Ademais, o Concello de Narón puxo á disposición da veciñanza auga embotellada en puntos de recollida e con entrega nos domicilios, nalgúns casos, durante os días nos que permaneceu a restricción para beber ou cociñar con auga procedente da rede de abastecemento».