O presidente do Padroado da Cultura de Narón, José Manuel Blanco, e o da Asociación Cultural Musical de Narón Sementeira, Manuel Rodríguez, asinarán esta tarde un convenio de colaboración para impartir clases de solfexo e instrumentos. A cita desenvolverase nas instalacións do Pazo da Cultura e suporá á administración local un desembolso de 50.000 euros.
O obxectivo deste acordo é a cooperación no eido musical entre o Padroado da Cultura e Sementeira. A maiores da aportación económica, que se incrementou nuns 5.000 euros con respecto ao ano pasado, o Padroado cederá á citada agrupación musical os instrumentos da súa propiedade, que deberán conservarse en bó estado. Pola súa parte, Sementeira comprométese a impartir clases de solfexo e instrumentos de vento e percusión de primeiro a quinto nivel; a manter a actividade da banda de música –que non poderá ter menos de 35 compoñentes-, e a realizar dez concertos ao ano en Narón. O convenio expira o 31 de decembro deste ano.
Un dos concertos que desenvolverá Sementeira na localidade terá lugar este sábado, día 23, no marco do III Encontro de Bandas de Música, que comezará ás 19:30 horas no Pazo da Cultura. Neste evento participarán a Banda de Música Sementeira de Cambre; a Banda de Música Municipal de Brión e a Xove Banda de Narón.