O Concello de Narón destina 332.100 euros á mellora de instalacións deportivas

O Concello de Narón destinará unha partida de 332.100 euros a investimentos para actuacións de mellora e de mantemento de varias instalacións deportivas municipais. Así o anunciaron esta mañá os edís de Obras Públicas, Pablo Mauriz, e Deportes, Román Romero, apuntando que «unha parte destes traballos se executaron a finais do ano pasado, mentres que outros están actualmente en execución ou pendentes de executar».

Esta mesma semana comezou a intervención que permitirá reformar e ampliar os vestiarios do pavillón da Mocidade, na Gándara, que suporá un desembolso de 107.000 euros, a partida máis elevada das nove contempladas neste paquete de actuacións. Os traballos consistirán na construción de seis vestiarios, dous aseos xerais e locais para o conserxe e mantemento, así como un espazo para o clube de boxeo, según explicaron os concelleiros.

Na actualidade están pendentes de executar tarefas de adaptación en vías de evacuación, onde incorporanse novas portas de evacuación en caso de incendio e ampliando as luminarias de emerxencia, entre outras, nas instalacións deportivas de Campo da Serra (Santa Icía), As Lagoas (Freixeiro) e Piñeiros, que tal e como apuntou o edil Pablo Mauriz «están incluídas no Plan de Acción Social (PAS) da Deputación da Coruña e suporán, en conxunto, un investimento de 49.000 euros». Así mesmo, «procederase a instalar iluminación led en Campo da Serra, unha intervención valorada en 12.000 euros», apuntou Román Romero.

En canto ás actuacións que xa remataron, están as reparacións eléctricas proxectadas nas instalacións deportivas das Lagoas, A Gándara e Santa Icía, que supuxeron ás arcas locais un desembolso total de 18.500 euros; a montaxe de novos canalóns na cuberta do pavillón da Gándara e a reposición de pavimento antideslizante na piscina destas instalacións, por 26.000 euros e 9.000 euros, respectivamente; o cambio de cuberta nos vestiarios do pavillón das Lagoas, valorado en 36.000 euros; a renovación do pavimento do pavillón polideportivo de Piñeiros, por 39.000 euros, e as obras do campo de fútbol de San Mateo, que custaron 35.600 euros.

O concelleiro de Obras Públicas destacou o «esforzo inversor que nestes tempos de crise realiza a administración local para poder atender estes traballos que veñen a oficializar a firme aposta deste goberno municipal polo mantemento e as novas obras en diversas instalacións deportivas». Pola súa banda, o edil de Deportes valorou os investimentos a realizar e avanzou que a intención do goberno local é «continuar traballando nesta liña para poder ter nas condicións óptimas estas instalacións nas que ao longo do ano moitos veciños e veciñas de Narón e tamén doutros concellos da zona practican diferentes actividades deportivas».