Alumnos de Narón participan no Programa de Difusión e Valorización da Cultura Tradicional

«O Padroado da Cultura de Narón desenvolve este mes unha serie de unidades didácticas sobre a música e o baile tradicionais enmarcadas no Programa de Difusión e Valorización da Cultura Tradicional».

Así o anunciou a vicepresidenta do organismo e concelleira de Cultura de Narón, Marián Ferreiro, que indicou que as sesións que se están impartindo en marzo se dirixen a un total de 228 alumnos de educación Infantil -3, 4 e 5 anos- dos centros que o solicitaron: CEIP Piñeiros, CRA de Narón e CEIP Ponte de Xuvia.

As unidades didácticas leváronse xa a cabo nos CRA de Pedroso, o 1 de marzo, e de Domirón o día 2, se ben os seguintes a desenvolver terán lugar o vindeiro luns, 7 de marzo, no CRA de Sedes, e o 9 de marzo no CEIP Ponte de Xuvia. O alumnado recibirá primeiro das persoas que imparten as sesións as pertinentes explicacións sobre o contido da unidade e tamén conceptos básicos sobre as diferentes familias de instrumentos. A continuación asisten a unha demostración práctica, na que se lles dá a oportunidade de escoitar cada instrumento para así poder diferencialos, e, por último, realizan unha práctica básica de dous bailes tradicionais, un solto e outro agarrados. Cada unha das sesións ten unha duración aproximada de cincuenta minutos.

As unidades didácticas do Programa de Difusión e Valorización da Cultura Tradicional comezaron a desenvolverse coincidindo co inicio do curso escolar, en setembro. Foi entón cando se impartiron en todos os centros de ensino do Concello ao alumnado de primeiro e segundo curso de educación Primaria, chegando a máis de 1.300 alumnos.

A vicepresidenta do Padroado destacou que este tipo de convocatorias «permiten desenvolver nos centros educativos unha serie de actividades formativas coas que achegar aos rapaces e rapazas de diferentes idades, a través de adaptacións curriculares diferenciadas, unha serie de coñecementos tanto dos bailes tradicionais galegos como dos instrumentos musicais utilizados polos nosos ancestros». Ademáis, Ferreiro valorou a participación dos diferentes centros de ensino da localidade neste programa.