O Concello de Narón programa actos para conmemorar o Día de Rosalía

As concellerías de Ensino e Bibliotecas e de Cultura, dirixidas por Mercedes Taibo e Marián Ferreiro, respectivamente, programaron varios actos con motivo da conmemoración do Día de Rosalía, o 24 deste mes.

A primeira das citas correrá a cargo da área de Ensino e Bibliotecas e consistirá nunha sesión de lectura de textos da recoñecida poetisa galega na Biblioteca municipal. O alcalde, José Manuel Blanco, e a edil de Ensino e Bibliotecas participará, xunto con outros representantes da corporación local, nesta actividade, que se desenvolverá a partir das 12 horas.

Mercedes Taibo recordou ao respecto que poderán asistir todos os veciños que o desexen para ler textos da citada autora, previamente seleccionados por eles ou escoller algún dos que se ofrecerán no propio centro. Antes de iniciarse esta sesión de lectura procederase a homenaxear ao socio número 16.000 da Biblioteca municipal, un veciño do Alto do Castiñeiro e cuxa familia é tamén usuaria do servizo.

«Coincidindo tamén co Día de Rosalía desenvolverase unha actividade programada desde a Concellería de Cultura». Así o avanzou a edil da área, Marián Ferreiro, que indicou que se procederá a inaugurar no Pazo da Cultura unha exposición de vestimentas e instrumentos tradicionais. A mostra poderá visitarse na entrada do Pazo da Cultura desde o día 24 de febreiro ata o 12 de marzo. «Tanto os traxes que permanecerán expostos como os instrumentos son propiedade do Padroado da Cultura, algúns destes últimos elaborados nos talleres de construción de instrumentos do Padroado», recordou a concelleira.

A programación para conmemorar o Día de Rosalía continuará desenvolvéndose o día 26 de febreiro, xornada na que terá lugar a sesión de contacontos infantil A paisaxe de Rosalía. Trátase dunha cita programada a través do Servizo de Normalización Lingüística de Narón e dirixida a nenos de 4 a 8 anos, según explicou Mercedes Taibo, e que se desenvolverá a partir das 18 horas na Biblioteca municipal.

Neste caso, subliñou a edil, «é necesario reservar praza –de balde-, polo que as persoas interesadas en asistir deberán facelo a partir deste luns, día 22, no mostrador da biblioteca ou chamando ao número de teléfono 981 382 173. Os nenos e nenas serán os protagonistas desta actividade», asegurou Taibo, que recordou que «se implicarán no momento da narración das aventuras e trasnadas da pequena Rosalía, tomando como referencia os poemas de Cantares Gallegos. Os menores irán solventando unha serie de probas para colaborar no desenvolvemento da historia a medida que esta avanza», indicou.

A edil Mercedes Taibo animou aos veciños e veciñas a participar nos actos programados para conmemorar o Día de Rosalía «para rendir así unha máis que merecida homenaxe a esta gran narradora e poetisa galega do século XIX ao cumprirse 179 anos do seu nacemento».

Pola súa banda, a concelleira Marián Ferreiro destacou que «con este tipo de actividades queremos recoñecer desde a localidade o valor do traballo de Rosalía de Castro a prol do uso da lingua galega e tamén da súa extensa obra, en moitos casos traducida a varios idiomas».