Galicia Ártabra Digital Noticias de Ferrol y la comarca de Ferrolterra.
Cinco centros educativos da provincia da Coruña participarán este curso en Eduemprende Actúa, un programa impulsado pola Consellería de Cultura, Educación e Ordenación Universitaria para o fomento do emprendemento na Formación Profesional. O obxectivo da actuación é poñer en valor o talento emprendedor como ferramenta para o desenvolvemento profesional, para o que se facilita que o alumnado teña contacto directo cunha persoa que teña posto en marcha a súa idea de empresa e que lles narra a súa experiencia en primeira persoa.
Na provincia da Coruña participarán na iniciativa os alumnos do segundo curso dos ciclos formativos IES A Sardiñeira (A Coruña), IES Monte Neme (Carballo), CIFP Rodolfo Ucha Piñeiro (Ferrol), IES de Fene e CIFP Compostela, na capital galega.
O programa enmárcase no Plan de Emprendemento no sistema educativo de Galicia Eduemprende, desenvolvido polas Consellerías de Cultura e Educación e de Economía, Industria e Emprego; concretamente no eixe estratéxico 1, Sensibilización e motivación, que agrupa o conxunto de obxectivos e medidas a desenvolver para que a comunidade educativa perciba a importancia de construír e fomentar a cultura emprendedora, para recoñecer no seu contorno actitudes e valores emprendedores, favorecendo a súa integración nos centros educativos e creando unha conciencia emprendedora.
Fases
Eduemprende Actúa vai dirixido ao alumnado de segundo curso dos ciclos formativos dos centros sostidos con fondos públicos de Galicia, e divídese en varias fases. Na primeira delas o profesorado do módulo de Empresa e iniciativa emprendedora realiza unha sesión na aula para presentar e reflexionar sobre a actividade que se vai desenvolver a continuación.
A fase 2 conta coa participación de persoal técnico do IGAPE, que presentará e coordinará a actividade, contestando ás cuestións, dúbidas e inquedanzas que o alumnado asistente formule. Despois desta introdución unha persoa emprendedora compartirá a súa experiencia persoal co alumnado, e abrirase un debate final sobre as cuestións que poidan interesar aos estudantes. finalmente, o profesorado e o alumnado analizarán na aula o resultado da actividade.
As actuacións desenvolveranse desde o 16 de febreiro ata o 15 de marzo de 2016 e chegarán a máis de 1.700 estudantes de toda Galicia.
