O BNG de Narón insta á Xunta ao cumpimento da Carta Europea das Linguas Rexionais

O portavoz do grupo municipal do Bloque Nacionalista de Galicia de Narón, Pablo Villamar, presentou esta mañá unha moción para o seu debate no pleno ordinario do 25 de febreiro na que se insta á Xunta de Galicia ao cumprimento  da Carta Europea das Linguas Rexionais e Minorizadas. A organización nacionalista tratará de que o texto sexa apoiado por todos os concelleiros da corporación naronesa.

«A moción vén motivada polas conclusións do 4º Informe de avaliación do cumprimento da Carta Europea das Linguas Rexionais e Minorizadas publicado o 21 de xaneiro», incidiu o portavoz nacionalista, sinalando que «nel, o Comité Internacional de Exportos inclúe unha serie de recomendacións do Consello de Ministros de Europea ao Estado español, entre as que se atopa a necesidade de dar cumprimento ás garantías ás que tanto o Estado español como a Xunta de Galiza se comprometeron ao ratificar a devandita Carta no ano 2001».

Nesa liña, o BNG solicitará o apoio do restos dos grupos municipais para que atenda o fragmento do Informe no que afirma que o decreto 79/2010 de Plurilingüísmo «contradí o estabelecido na Carta, así como o punto 5º da Resolución do Consello de Ministros de Europa no que se sinala que a introdución dunha terceira lingua no ensino “non pode afectar negativamente á propia», incidiu Villamar.

Na moción ínstase á Xunta a elaborar un novo decreto para o uso do galego no ensino e que, mentres iso non aconteza, derrogue os artigos que limitan o uso do galego nas aulas, as porcentaxes máximas de materias a impartir en galego e a prohibición de impartir na nosa lingua as materias científico-técnicas ou matemáticas.